Zenegeist專訪：新青年理髮廳

名字源自一間紅磡歷久常新的電髮廳-- 新青年理髮廳，最近網上紅爆，連月來表演訪問頻繁，識你佳有幸採訪他們做了一個簡單的小訪問︰

發仔(左)︰下稱 發
Showroom(中)︰下稱S
歐陽(右)︰下稱 歐
識你佳︰下稱 Z

1.
(Z︰ 你地3人各有崗位︰ 發仔負責文字，歐陽負責音樂，Showroom負責設計，有別於一般FULL BAND的形式，你地會點形容自己?)

發︰ Showroom冇咩特別架佢，閒人一個。
歐︰ 未試過形容自己，如果要形容我地三就是[創作單位]吧。

2.
(Z︰ 你地很多時候都會聯同客席鼓手一齊演出，點解佢唔加入你地呢?)

歐︰ 你應該問點解會有個客席鼓手係到，哈哈。
發︰ 因為演出時需要鼓聲，但我地又冇人識打鼓所以演出時要請朋友幫手。
遲啲我地需要影相都會叫朋友幫手做攝影師，但無可能統統都加入，個個都加入咁咪會全個世界都係!?

3.
(Z︰ 你地的靈感都來自生活，會唔會有一些特別的音樂單位啟發你地的創作?)

S︰ 歐陽負責作歌的，有啲咩啟發到你?發仔有冇啟發到你?
歐︰ 有啊。音樂單位的話……無咩特別，我都唔知，哈哈。
(Z︰ 咁平時聽開D咩歌多?)
歐︰ 咩歌都會聽下，好雜。

4.
(Z︰ 創作上，通常會詞入手先定曲入手先?)

歐︰ 就好似《敢動》中段的RAP唔係根據曲作的，因為發仔寫詞唔需要先有曲。
發︰ 其實重要都係有題材，不過正常就有曲先有詞。
(Z︰ 但點樣先寫詞後寫曲?)
發︰ 譬如好似王菲個首《但願人長久》咁就係有詞先，不過都幾難架。

5.
(Z︰ 你地作品都係廣東話作品，會唔會感到特別難創作?)

發︰ 其實廣東話真係唔易，不過係母語所以掌握上黎係最好。
歐︰ 其實普通話就易好多，但始終廣東話最熟。
(Z︰ 咁會唔會嘗試國語或者英文的創作?又或者試下寫愛情﹑社會之類的題材?)
歐︰ 暫時未有咁的諗法，因為我地英文好差。
題材方面…可能會都可能唔會，唔會規限自己。其實都係睇將來發生的事同靈感，將來的事大家都唔知。

6.
(Z︰ 呢個問題有趣D, 你地組成左幾耐?)

發︰ So funny﹗ 咁我都要答得有趣d。好耐喇，四個月。
(Z︰ 你地youtube有一段片係地鐵唱歌俾外國人聽，個陣你地組成新青年理髮廳未?)
發︰ 其實我地個陣仲係叫歐陽與發仔。
個次去完朋友到表演，就好即興咁表演，唔係計劃好的。好似依家咁…(隨即歐陽相當有默契地奏出《敢動》前奏)
S︰(突然對錄音器材講) Hello我係Showroom呀!
依家冇人訪問我，我係新青年理髮廳係負責設計，
歐陽依家彈緊呢首歌叫《敢動》。

7.
(Z︰ 組成左4個月會唔會經常嗌交?)

發︰ 日日都嗌交啊我地! 歐陽今日先拎左我30蚊!
歐︰ 得，遲啲還遲啲還...
發︰ 我覺得佢地好自私囉!真架，好似今日咁，迫我一定要黎。
歐︰ 咁今日要做訪問無辦法啦。
發︰ 嗌交就成日有，不過好多時都係講下笑。
S︰ 唔好講出去呀。上次咪有個記者八掛囉，問我地咩事，
第二日就唔知去左邊。

8.
(Z︰ 早前實體發行的《多管閒事》，收錄左《敢動》、《放假總要在雨天》、《如果一生只有三十歲》、《飛向理想的世界》同埋《一放工菊花都放鬆》5首歌。點解會揀呢5首呢? 係咪有咩特別?)

S︰ 其實就冇咩特別。
5個月前，差唔多畢業的時候就開始構思呢隻碟的內容，
不過個時咩都冇，連名都未有。但係有出碟的衝動，要威下!
歐︰ 其實唔係為威既。如果你有買我地CD你就會知其實係一個旅程︰
好似第一首《敢動》係仲讀緊書的時候作﹔
跟住《一放工菊花都放鬆》就係出黎做野﹔
之後《放假總要在雨天》講返工的感覺﹔
工作耐左就會有《如果一生只有三十歲》的諗法﹔
最後《飛向理想的世界》就係......飛向理想的世界。

9.
(Z︰ 來年有咩大計，或者有咩目標想去達成?)

歐︰ 咁我希望可以對屋企人好啲既。
S︰ 上太空，我想上太空。
歐︰ 我想…
S︰ (再次強調)我要上太空!
歐︰ 我希望…
S︰ (對住錄音器材講) 我想上太空，我係SHOWROOM，我想上太空!
歐︰ 我想我可以唔用手彈他!
發︰ 出多啲 show，繼續創作。
S︰ 認真。Keep住我地依家做緊的野，其實好難，
要繼續keep住﹑堅持一年就已經係好唔簡單﹑好大的計劃。

10.
(Z︰ 你地既facebook有個卡式帶既頁面，我鐘意入面既純音樂，會唔會繼續發展落去? 或者會擴展到幾首歌?)

歐︰ 識貨喎你。卡式帶既原意就係播一d短既、大約一分幾鐘既純音樂。
(Z︰ 會唔會再錄多幾首歌，將佢地以實體既卡式帶售賣?)
發︰ 都可能會既，有得諗，多謝你的建議。

11.
(Z︰ 有冇諗過同其他單位合作?)

S︰ 我地想有呢個機會好耐，不過冇人搵我地合作。
發︰ 我好想同陳奕迅合作!
S︰ 其實現時冇特別主動去搵人都冇人搵我地，
當然我地都希望合作，不過現階段我地想做好自己先。

12.
(Z︰ 覺得現時香港的音樂生態如何?)

發︰ 我覺得幾多元化。
S︰ 大圍的環境我答唔到你， 我只可以咁講，我地要做自己野其實係好難堅持。

13.
(Z︰ 我們的名字「Zenegeist」是源自匈牙利的「Zene」與德文的「Geist」，合併起來的意思就是「音樂的精神」，而你地又認為音樂的精神是甚麼呢？)

發︰ 忠於自己。
歐︰ 啱，我地忠於自己地玩，玩音樂，玩創作。
S︰ 其實我地好OPEN，希望多D人搵我地合作一齊玩!

P.S訪問中要對應他們有默契又密集的幽默，對初出茅廬的我們是一個挑戰，
但輕鬆愉快的訪問過程盡顯他們年輕玩樂的本色，
更即興作了《識你佳淘寶買LIKE》的奇趣作品(真希望有機會命世!)

﹣梅迪斯，Rsdnaa